A industria do videoxogo abrangue o traballo conxunto de profesionais de varios ámbitos nas diferentes fases do desenvolvemento deste tipo de produtos. O ano pasado superou unha facturación de 2000 millóns de euros no estado. Unha desas fases é da construción da narrativa e das mecánicas que rexen a experiencia dos xogadores, eixes centrais do semanario que o xoves 5 e o venres 6 de outubro se desenvolveron na Facultade de Comunicación, coa participación dunha trintena de expertos e profesionais da industria.
O seminario Deseño da narrativa nos videoxogos a través das mecánicas e a estética estivo organizado polo grupo de investigación V-NPC (Videoxogos, Narrativa, Persuasión e Comunicación) e a asociación de investigadores Digra Spain, coa colaboración da facultade, o Consello Social da Universidade de Vigo e a editorial Icono14. Desenvolveuse nun formato híbrido, combinando as intervencións presenciais e virtuais, e co obxectivo “de buscar unha conexión entre academia e industria”, como sinalou a responsable do comité organizador, a profesora Beatriz Legerén.
Unha das mesas do seminario na Facultade de Comunicación
“A idea deste seminario é falar daquelas cuestións que normalmente non se tratan á hora de falar de narrativa e videoxogo”, salientou Legerén, que incide en que, polo xeral, na análise desta fase do desenvolvemento dun xogo ponse o foco “na historia”, máis non tanto noutra serie de “aspectos fundamentais”. Ese sería o caso da “parte estética, na que incluímos tanto a parte gráfica como a sonora”, pero tamén das mecánicas, “xa que un xogo ten que ter uns obxectivos, unha economía e unhas condicións de vitoria”, explicou a tamén coordinadora do grupo V-NPC na inauguración. Neste acto, Legerén estivo acompañado pola decana, Emma Torres, quen puxo de relevo a importancia que teñen para a facultade actividades como este seminario, que permiten “non perder contacto coa realidade profesional”, á vez que contribúen á “máxima fundamental” do centro, que é “formar creadores de contidos”.
Dúas xornadas de traballo conxunto que se plasmarán nun libro
Ademais de promover unha reflexión entre especialistas e profesionais da industria, o obxectivo foi tamén “traballar conxuntamente” neses dous bloques de contidos, a través de dunha serie de grupos de traballo. Estes xerarán unha serie de conclusións, que se recollerán, xunto co abordado nas conferencias, mesas de debate e nas dez comunicacións que se presentan nestas xornadas, nun libro que fará balance do que, engade, “penso que é o único seminario a nivel nacional centrado exclusivamente nestes aspectos”.
Con esa idea, o seminario arrancou o xoves cunha xornada dedicada á estética dos videoxogos, que abriu unha conferencia da “figura de referencia nos estudos de videoxogos en España”, o investigador da Universitat Pompeu Fabra, Antón Planells, quen afondou nas “narrativas hexemónicas e marxinais” neste tipo de producións e reflexionou respecto da existencia de “argumentos universais”. Tamén o xoves, o foro acolleu unha mesa de debate sobre a creación de personaxes, escenarios e interfaces gráficas e outra sobre o uso de sons, música e locución. Ovenres, o seminario puxo o foco nas mecánicas, cunha mesa de debate na que participaron, entre outros, o game designer de Tequila Works Michael Santorum e outra sobre como os elementos narrativos son percibidos polas persoas xogadoras, para pecharse coa posta en común dos resultados obtidos polos grupos de traballo.