A asemblea xeral da Conferencia de Consellos Sociais das Universidades Españolas (CCS) celebrou o 20 de marzo unha reunión extraordinaria en formato híbrido para analizar o desenvolvemento autonómico da Lei Orgánica do Sistema Universitario (LOSU). O obxectivo era pór en común os traballos que se están realizando para axuntar esforzos na mellora do tratamento que dos Consellos Sociais fai a actual lexislación.
Primeiro, o secretario xeral da Conferencia, Miguel Ángel Acosta, explicou os pasos que está a dar o Ministerio de Ciencia, Innovación y Universidades na posta en marcha dos distintos aspectos que contempla a nova norma. Aludiu á comisión do plan de financiamento das universidades públicas españolas e aos novos criterios de acreditación para os corpos docentes universitarios.
Respecto ao primeiro punto, tras diversas reunións da Conferencia General de Política Universitaria, o Goberno presentou o “Programa para la Incorporación de Talento Docente e Investigador a las Universidades Españolas, que implicará financiar con 150 millóns de euros anuais por curso académico un total de 3.400 prazas de profesores e profesoras axudante doutor nas universidades públicas do noso país a partir do próximo curso 2024-2025 e durante o seis anos de duración desta modalidade de contrato”.
Pola súa banda, ANECA acaba de publicar “os novos criterios de avaliación dos méritos e competencias requiridos para obter a acreditación aos corpos docentes universitarios (Profesor/a Titular de Universidade e Catedrático/a de Universidade), e os niveis de referencia esixibles para obter unha avaliación favorable. O programa de acreditación de profesorado funcionario, que en 2023 recibiu 6.730 solicitudes (case un 50 % máis que en 2022), queda así adaptado ao establecido na LOSU e no RD 678/2023, actualizándose o anterior sistema aprobado en 2007 e modificado en 2015″. Entraron en vigor o 1 de abril. A axencia afirma que “o novo Procedemento garante a axilidade e a petición de documentación accesible, en modo aberto, abreviada e significativa”.
A continuación, representantes dos Consellos expuxeron a marcha do desenvolvemento lexislativo da LOSU a nivel autonómico. O presidente da CCS, Antonio Abril Abadín, reiterou “a importancia de traballar xunto coas CCAA para impulsar a excelencia do sistema universitario e introducir cambios en materias significativas que a lei deixa nas súas mans, así como nos novos estatutos que deben redactar os propios centros”.
Durante a reunión, o presidente da CCS deu a benvida aos presidentes e secretarios que se incorporaron nos últimos meses e repasou a actividade recente da Conferencia. Os asistentes á Asemblea tamén coñeceron os detalles principais do estudo Análisis de las competencias más demandadas de egresados universitarios, froito do convenio subscrito con REDFUE.
A reunión concluíu coa aprobación, por unanimidade, do nomeamento de Ana Suárez, presidenta do Consejo Social de la Universidad de Las Palmas de Gran Canaria, como nova vogal do comité executivo tras a saída de Ángel Tristán do devandito consello.