A Semana da Creatividade comeza o luns 22 cunha apertura institucional na sede da Vicerreitoría e coas xornadas Deseño e infografía. Diversas olladas á comunicación visual, na Facultade de Deseño. Estas abriranse cun coloquio sobre deseño de información e visualización de datos, a cargo de Álvaro Valiño, e outro sobre a creación de carteis para cinema e televisión, impartido por Catarina Sampaio, e continúan pola tarde con dous obradoiros, con inscrición previa, impartidos por estes dous profesionais do deseño e a ilustración.
Así mesmo, desde o luns poderá visitarse na sala O Abrigo, da Facultade de Belas Artes, a exposición sobre arqueoloxía dixital Voute preservar, miñoca! Onde os videoxogos en galego e a arqueoloxía se dan a man, unha mostra comisariada polo investigador do Grupo de Estudos de Arqueoloxía, Antigüidade e Territorio (GEEAT) Óscar Penín. Centrada nas cada vez máis fondas conexións do traballo da pouco coñecida arqueoloxía contemporánea cos mundos virtuais, a mostra contará con visitas guiadas para grupos, previa reserva no correo electrónico oscar.penin@uvugo.gal.
Xa o martes 23, a actividade continuará na Casa das Campás coa xornada Diálogos entre IA e creatividade, que afondará no impacto da intelixencia artificial nos procesos creativos. O evento abrirase coa conferencia Como dirixir artisticamente un robot?, a cargo de Eren Saracevic, profesor da Barcelona School of Arts & Design, e continuará cun relatorio do ilustrador e deseñador gráfico Luis Demano, que porá en relación estas ferramentas xerativas e os dereitos de autor. A xornada pecharase cunha mesa redonda moderada polo profesor de Dereito Mercantil da UVigo Pablo Fernández Carballo-Calero.
A creatividade aplicada á moda e aos produtos deportivos será o mércores o eixe dunha mesa na Facultade de Ciencias da Educación e do Deporte, na que participarán representantes de Zara Athleticz, Bh Fitness e Artesanía de Galicia. Tamén nesta terceira xornada, Belas Artes acollerá Linguaxe e Creatividade. Un binomio inseparable, que abrangue dúas conferencias e dous obradoiros. O primeiro dos relatorios, De Tolkien ao Klingon: a aventura de inventar linguas, correrá a cargo do profesor de Ciencias da Educación e do Deporte Carlos Valcárcel, que suma máis de 600.000 seguidores en redes sociais polo seu labor de difusión da interlingua. A continuación, o artista e investigador Alberto Santos impartirá o coloquio Graffiti Writing.
Esta “Semana” céntrase nas principais liñas do proxecto de especialización
Do impacto da intelixencia artificial nos labores creativos ao proceso de invención dunha lingua, pasando polo deseño de carteis para cine, a creatividade na moda ou as conexións entre arqueoloxía e videoxogos. Un conxunto de temáticas conectadas coas principais liñas do proxecto de especialización Campus Crea centran a Semana da Creatividade 2024, que se desenvolverá en Pontevedra entre o 22 e o 26 de abril. Preto de 15 actividades, entre as que figuran xornadas, coloquios, obradoiros, exposicións, concursos ou actuacións, integran un programa deseñado polo Comité de Dirección do Campus Crea e promovido co apoio da Deputación de Pontevedra e do Consello Social da Universidade de Vigo.
“A programación deseñouse buscando un equilibrio entre as diferentes liñas do proxecto de especialización”, de tal xeito que se ben existen “algunhas máis específicas, son en xeral moi interdisciplinares”, salienta a directora de área do Campus de Especialización Crea, Ana Belén Fernández Souto. Con entrada libre e abertas ao conxunto da cidadanía, coa excepción dos obradoiros, que requiren de inscrición previa, trátase, lembra, dun conxunto de iniciativas que buscan afondar nos eixes dun proxecto de especialización que pon o foco nas conexións da creatividade coa comunicación, o deseño, a creación artística ou a educación.
Creatividade publicitaria e xornadas Pensamento e Creación
Na tarde do mércores botará a andar tamén, na sede da Vicerreitoría, unha nova edición das xornadas Pensamento e Creación, un ciclo de relatorios e actuacións promovido coa Aula Castelao de Filosofía. Esta iniciativa ábrese na tarde do mércores coa conferencia Soidades do alfabeto. Foulas e prodixios do pasado, do filólogo, profesor e poeta Calros Solla, e complétase coa participación do cantautor galego Tino Baz, que abordará o papel da palabra no eido musical.
Á xornada seguinte, a Facultade de Comunicación acollerá a conferencia Fame de Ideas!, centrada na industria da publicidade, así como no Club de Creativos e nos seus Premios Nacionais de Creatividade CdeC, da man da integrante do seu comité de dirección e responsable da axencia BAP&Conde, Raquel Quintana. Tamén nesta xornada, a Vicerreitoría acollerá unha nova proxección do ciclo de cine Expediente Alquimia (II), mentres que o venres acollerá un obradoiro de Mindset Emprendedor, inserido nas actividades do proxecto europeo HEI4Future e centrado, sinalan, nas “características dunha mentalidade emprendedora”.
Para esta xornada do venres está previsto tamén o acto de entrega de premios do concurso de vídeos en TikTok, que mantén aberta a súa inscrición ata o 15 de abril, así como unha serie de visitas escolares á exposición sobre arqueoloxía dixital galega, que contará ademais cunha zona de videoxogos clásicos en galego.
Xa pola tarde, esta programación botará o peche na Casa das Campás coa segunda sesión das Xornadas de Pensamento e Creación, que arrancará cunha conferencia da artista e profesora da Facultade de Belas Artes Andrea Costas. Nun relatorio titulado Corpos de memoria, Costas realizará unha presentación comentada dalgúns dos traballos que desenvolveu ao longo das últimas dúas décadas, na que afondará tanto na súa xénese como na súa formalización final, “pasando polas incertezas propias dos proxectos de creación”, como subliñan desde a organización. Co concepto do tempo como eixe central, esta iniciativa completarase co espectáculo Arteria temporal, que combinará o recital e a acción escénica, da man do dúo de poesía escénica Cintaadhesiva, colectivo integrado pola poeta e actriz Silvia Penas e o deseñador gráfico, músico e videocreador Jesús Andrés Tejada.