Actos do presidente

O paseo da comitiva académica de profesorado togado entre os colexios de San Xerome e Fonseca pola rúa do Franco abriu o venres 6 de setembro o acto de inauguración do curso 2019/20 nas universidades galegas, celebrado por quenda rotatoria na institución compostelá.  A mesa presidencial do acto estivo composta polo reitor da USC, Antonio López e polos seus homólogos Julio Abalde Alonso da UdC e Manuel Reigosa Roger da UVigo, acompañados polo presidente da Xunta de Galicia, Alberto Núñez Feijóo, e  polo presidente do Consello Social da Universidade de Vigo, Ernesto Pedrosa Silva.

No inicio da súa intervención, Antonio López destacou que o novo curso coincide coa conmemoración do trixésimo aniversario da creación das universidades da Coruña e Vigo. O reitor da USC reivindicou a necesidade dunha nova Lei Orgánica de Universidades, chamando a atención da pertinencia de “abordar a nivel nacional a reforma da Lei Orgánica de Universidade”, na procura dun “novo marco xeral para as Universidades”. Así mesmo urxiu pola definición dun novo plan plurianual de financiamento do SUG dentro dun “marco xeral de financiamento do ensino superior que lle permita recuperar, cando menos, parte dos recursos perdidos neste período de crise e que teñen influído na nosa estrutura e nas condicións do noso persoal e tamén no estados das nosas infraestruturas”.

Graos abertos e especialización

Na súa intervención, o presidente da Xunta, Alberto Núñez Feijóo, anunciou o desenvolvemento dunha experiencia piloto de graos abertos a partir do curso 20-21, nos que os alumnos poderán elixir durante ano e medio materias de varias carreiras antes de decidirse definitivamente por unha delas. O presidente salientou que a comunidade galega será a terceira en implantar esta fórmula e explicou que na experiencia piloto do vindeiro curso 2020-2021, o número de prazas ofertadas será dun máximo de 25 para cada grao aberto, sendo 5 o número máximo de graos do programa e contando coa correspondente subvención.

Lección maxistral

Na conferencia ‘A década que cambiou a química analítica’ o catedrático Rafael Cela Torrijos presentou a química analítica como a “ciencia da información química”, sendo nesta disciplina onde se desenvolveu durante a década dos 70 e seguintes a quimiometría, “que evolucionou e diversificou os seus obxectivos, foi adoptada por outras ciencias, en ocasións modificando a denominación para facela un pouco máis súa, pero que continúa o seu desenvolvemento esencialmente neste campo da ciencia”.

O acto contou cunha numerosa representación de distintas institucións sociais, políticas, culturais e académicas de toda Galicia.

[Fotografías e información recollidas do Xornal da USC]