Miles de pequenas caras con xesto de asombro sucedéronse hoxe no transcurso do máis dun cento de actividades de divulgación científica e tecnolóxica celebradas co gallo da Noite Galega das Persoas Investigadoras nas rúas, parques, bares e museos de Vigo, Ourense, Pontevedra, Santiago de Compostela, A Coruña, Ferrol e Lugo. Coordinada pola Universidade de Vigo, a G-Night volveu sacar hoxe a ciencia dos laboratorios e das aulas achegándoa a nenas e nenos e persoas adultas que, baixo o lema Conciencias creativas, sumáronse nas principais cidades galegas á Noite Europea das Persoas Investigadoras, un proxecto de divulgación científica promovido pola Comisión Europea, que se desenvolve simultaneamente en case 400 cidades europeas dende 2005.
Experimentos, charlas, danza e música no Berbés
O edificio Redeiras, na praza do Berbés, foi o epicentro un ano máis da G-Night en Vigo, cunha gran feira científica, integrada por unha vintena de postos, nos que as persoas asistentes participaron dunha morea de actividades que lles permitiron, da man de investigadores e investigadoras da UVigo e través de amenos experimentos, achegarse ao universo, aos materiais, a acuicultura, a intelixencia artificial, monitorización de aves mariñas, o tratamento das augas, agroecoloxía, comunicacións dixitais, nanopartículas plasmónicas ou ciencia económica.
Literatura, escritura antiga e ciencia en rúas e bares de Pontevedra e Ourense
A G-Night madrugou en Pontevedra, que con saída ás 10 da maña da igrexa de San Francisco, celebrouse un roteiro literario, coordinado pola docente do Departamento de Filoloxía Galega e Latina da UVigo Ana Acuña. As e os participantes percorreron lugares da cidade que teñen algunha significación desde o punto de vista literario, ademais de poder familiarizarse con autores ou autoras de diferentes períodos. A escritora Fina Casalderrey foi a encargada de rematar o roteiro, salientando a relación da súa obra coa cidade. Tamén na capital pontevedresa a Misión Biolóxica de Galicia organizou un xogo de escapada co obxectivo é reflexionar sobre a perda de biodiversidade, o cambio global, a escaseza de auga, a saúde do solo e das sementes e da súa importancia para alimentar o mundo.
Mentres, en Ourense a Facultade de Historia acolleu obradoiros sobre linguas da antigüidade nos que as persoas participantes recrearon as escritas antigas da man do grupo de investigación GEAAT. Pola súa banda, o Café & Pop Torgal acolleu dúas charlas científicas: Aprendizaxe baseada en xogos e o colectivo transxénero, a cargo de Paula Rodríguez, do Departamento de Análises e Intervención Psicosociocioeducativa e A ciencia axuda a reducir a violencia de xénero, a cargo de María José Vázquez do Grupo de Psicoloxía Xurídica e da Saúde: convivencia e benestar e Jennifer Rodríguez, traballadora social.
Toda a información e unha colección de instantáneas no DUVI.